ГУЙЯН (Қытай), 2026 жылғы 26–27 тамыз — Қазіргі заманғы бессайыстан UIPM әлем чемпионатында жеке есептегі жартылай финалдардың барлық қатысушылары анықталды. Қазақстандық спортшылар ерлер квалификациясында да, әйелдер квалификациясында да топ-36 қатарына кіре алмады.
Ерлер
26 тамызда 112 қатысушы арасында үш топта өткен ерлер квалификациясында Қазақстан намысын бес спортшы қорғады:
- Тихон Варёхин — 41-орын, 1552 ұпай;
- Данил Богданов — 56-орын, 1518 ұпай;
- Лев Чувашов — 57-орын, 1517 ұпай;
- Кирилл Стадник — 59-орын, 1512 ұпай;
- Темірлан Әбдірайымов — 62-орын, 1507 ұпай.
Жартылай финалға шығу үшін топ-36 қатарына ену қажет еді, сондықтан Қазақстан өкілдерінің ешқайсысы семсерлесудің рейтингтік раундында күресін жалғастыра алмады.
Әйелдер
27 тамызда жартылай финалға шығу жолында екі квалификациялық топта 76 спортшы қыз бәсекеге түсті. Қазақстан намысын үш бессайысшы қыз қорғады:
- Юлиана Петрова — 55-орын, 1325 ұпай;
- Аяна Қазбекова — 60-орын, 1311 ұпай;
- Ярославна Понер — 61-орын, 1308 ұпай.
Алда не күтіп тұр?
Осылайша, Қазақстан құрамасы Гуйяндағы әлем чемпионатының жеке дисциплиналарында өнер көрсетуін аяқтады. Енді команда келесі маңызды стартқа — Жапонияда өтетін 2026 жылғы Азия ойындарына дайындыққа ден қояды.
Федерацияның бас серіктесі — Samruk Kazyna, серіктесі — SportQory туризм және спорт индустриясын қолдау қоры.